Teatri i Operës dhe Baletit do nisë sezonin artistik online. Bëhet fjalë për një sezon artistik online, me një program që përmban opera, koncerte, balet, etj, duke iu përshtatur edhe situatës nga koronavirusi.
Sikundër dhe të tjerë institucione, edhe Teatri i Operës dhe Baletit pezulloi aktivitetin artistik për publikun në skenë. Ky institucion do të nisë sezonin online, për të cilin artistët po zhvillojnë provat në shtëpitë e tyre, për të përcjellë programin muzikor.
“Sezon artistik online ndiq “Opera me pizhama”, prej datës 11 prill, opera, balet, koncerte, performanca-soul”, shprehet Teatri Kombëtar i Operës, Baletit dhe Ansamblit Popullor (TKOBAP).
Opera “La Boheme” që ishte lajmëruar më parë nga TOB, nuk arriti të ngjitej në skenë këtë sezon, për shkak të situatës së krijuar nga Covid-19.
Drejtoresha e TKOB, Zana Çela, bën me dije se artistët po zhvillojnë provat në shtëpitë e tyre, për të përcjellë programin muzikor.
“Shfaqjet online do fillojnë në 11 prill, pra këtë javë ne kemi premierën e parë online. Vendosëm që t’ju qëndrojmë pranë njerëzve përsëri, sidomos pranë fansave të operës, që janë mësuar të na dëgjojnë, të na shikojnë dhe menduam t’ju servirim publikut pikërisht një sezon artistik online. Të gjitha gjinitë e shfaqjeve do të transmetohen në faqen e YouTube të TKOBAP dhe njëkohësisht linqet përkatëse do të shpërndahen në web, Facebook dhe Instagram”, deklaron drejtoresha e TKOB, Zana Çela.
