Përpjekja e fundit për Masimiliano Alegrin dështoi, Interi kaloi një ditë plot kontakte dhe bisedime për të gjetur pasuesin e Antonio Kontes. Duke marrë shkasë edhe nga vonesat e rinovimit që ende nuk ka ardhur mes Inzagit dhe Lacios, drejtuesit e bluzinjve kanë rivendosur kontaktet me Simone Inzagin pasditen e sotme. Trajneri i të kaltërve, dje në mbrëmje kishte arritur një marrëveshje me Lacio për rinovimin deri në 2024-ën, por firma në fund të kontratës nuk është shënjuar ende.
Një situatë që ka favorizuar tentativën e re të Interit, e cila madje është materializuar, sipas burimeve që zotëron ‘Calciomercato.it’, me një ofertë prej afërsisht 5.5 milion euro, përfshirë bonuse. Pak a shumë dyfish nga ajo që ofron Klaudio Lotito tek Lacio. Presidenti i Lacios pati një bisedë së fundi me Inzagin, por nga burime pranë Interit ka optimizëm për mbylljen e marrëveshjes, duke pasur parasysh se një akord në parim tashmë është arritur.
