Ish-kryetari i Partisë Demokratike Eduard Selami ka reaguar në lidhje me vendimin e Departamentit Amerikan të Shtetit (DASH), për të shpallur ”non grata”, ish-kryeministrin Sali Berisha dhe familjen tij.
Përmes një postimi në rrjetet sociale, Selami ka falenderuar Shtetet e Bashkuara të Amerikës për futjen e Berishë në listën e zezë të Departamentit Amerikan të Shtetit.
Sipas Selamit, ky është fillimi i fundit të korrupsionit dhe pandëshkimit të lartë e të gjatë në Shqipëri. “Fillimi i fundit te korrupsionit dhe pandeshkimit te larte dhe te gjate ne Shqiperi. Faleminderit USA.”, shkruan Selami në Twitter.
Fillimi i fundit te korrupsionit dhe pandeshkimit te larte dhe te gjate ne Shqiperi.
Faleminderit USA— Eduard Selami (@SelamiEduard) May 19, 2021
Ish-kryeministri Sali Berisha u shpall non-grata sot nga Departamenti Amerikan i Shtetit bashkë me familjen e tij.
Lajmi për shpalljen ”non grata”, u dha nga Sekretari Amerikan i Shtetit, Antony Blinken, i cili njoftoi zyrtarisht se Berisha ka minuar demokracinë, dhe se gjatë ushtrimit të detyrës së kryeministrit, është përfshirë në afera korruptive.
Në faqen zyrtare, DASH ka publikuar vendimin e plotë, ku thuhet se Berisha ka qenë i përfshirë në veprime korruptive për shpërdorim të fondeve publike, dhe ndërhyrje në proceset publike duke përdorur pushtetin.
Në vendimin e tij, Blinken ka përcaktuar si të papërshtatshëm edhe bashkëshorten e ish-kryeministrit Liri Berisha, djalin Shkëlzen Berisha dhe vajzën Argita Berisha Malltezi.
