Droga ishte fshehur si skrap dhe destinacion kishte Spanjën. Nëse do të shitej, ajo do të kapte vlerën e 200 milionë eurove. Ministri kolumbian i Mbrojtjes, Luis Carlos Villegas, tha se droga është konfiskuar në qytetin verior të Barranquilla-s, të premten, në momentin kur ishte gati e paketuar për t’u nisur drejt Spanjës.
“Siç edhe mund ta shikoni, policia e shtetit ka konfiskuar sasinë e tretë më të madhe të kokainës në historinë e territorit kolumbian. 6 tonë dhe 152 kilogramë kokainë e pastër”, tha Villegas.
Villegas shtoi se droga, e cila ishte fshehur si skrap, do të kishte arritur në treg vlerën e mbi 200 milionë eurove.
“Këto barna i përkasin një konsorciumi të kryesuar nga klani Gulfo dhe organizata të tjera, që bashkëpunojnë në veri dhe në lindje të vendit. Këto grupe kanë marrë një goditje të madhe edhe në Spanjë, vend ku ishte e destinuar droga dhe që do të kapte vlerën 200 milionë eurove”, shpreh Villegas.
