Ka nisur në Gjykatën e Krimeve të Rënda seanca gjyqësore për çështjen ndaj Emiljano Shullazit. Ky i fundit akuzohet se ka kërcënuar rektorin Mynyr Koni, ndërsa janë thirrur për të dëshmuar një sërë zyrtarësh.
Bëhet fjalë për Saimir Tahirin, ish-ministër i Brendshëm, kreun e Policisë së Shtetit, Haki Çakon, ish-rektorin Dhori Kule dhe rektorin Mynyr Koni.
Në gjykatë janë paraqitur Mynyr Koni, Haki Çako, Dhori Kule, Majlinda Keta dhe Shezai Rokaj dhe ish-ministri Tahiri.
Tahiri ka dëshmuar më parë lidhur me kërcënimin e rektorit Koni, konkretisht më 24 mars të këtij viti.
Ndërkohë, është zbardhur dëshmia e dhënë sot në Gjykatën e Krimeve të Rënda nga ish-ministri i Brendshëm Saimir, Tahiri, i cili mësohet se ka përmendur disa herë emrin e ish-kryeministrit Berisha, teksa ka pyetur përse ky i fundit nuk është thirrur për të dëshmuar.
Në dëshminë e tij, Haki Çako dëshmoi se “Dhori Kule ma pohoi që u kërcënua nga Shullazi”.
NGJARJA:
Emiljano Shullazi u arrestua më 17 prill të vitit të kaluar, pas deklaratave të ish-kryeministri Berisha. Ky i fundit deklaroi se Emiljano Shullazi kishte kërvënuar kandidatin për rektor të Universitetit të Tiranës, Mynyr Konin që të tërhiqej nga gara, në të kundërt do t’i merrte peng fëmijët.
Pas deklaratës së Berishës, rektori Mynir Koni doli në një konferencë për shtyp, ku tha se nuk do të tërhiqet nga gara, ndërsa nuk mohoi dhe as nuk pohoi se ishte kërcënuar nga Emiljano Shullazi.
Pas këtyre deklaratave, policia kreu një aksion ku ndaloi dhe shoqëroi Emiljano Shullazin dhe Gilmano Danin, ndërsa pas disa orësh atyre iu komunikua edhe arrestimi me kërkesë të Prokurorisë së Krimeve të Rënda.
Paralelisht me arrestimin policia ka ushtruar edhe kontroll në banesën e Shullazit në “Rrugën e Kavajës”, ndërsa Shullazi ka mohuar të ketë kërcënuar kandidatin për rektor.
“Nuk kam kërcënuar askënd. Nuk e njoh atë njeri dhe s’kam lidhje me të”, mësohet të ketë thënë Shullazi në Polici.
