Pas paralajmërimit të Ramës për studentët, se do tu digjet viti akademik, një kundërpërgjigje ka ardhur nga kryedemokrati Basha. Gjatë një takimi që zhvilloi në fakultetin e Mjekësisë një ditë më parë me studentët, Rama tha: “Nëse prisni dhe nuk veproni, nuk i merrni dot bursat sepse ne nuk i japim dot pa na sjellë dokumentacionin”.
Por mesazhit të shefit të qeverisë i është përgjigjur nga Fieri kreu i PD, Lulzim Basha. “Asnjë shans nuk ka Edi Rama t’ua djegë studentëve vitin akademik. Ai do jetë i plotë dhe do të njihet i plotë bashkë me mirënjohjen e tyre në këtë zgjim të madh kombëtar që ka e do të ketë, vetëm një përfundim, çlirimin e Shqipërisë nga oligarkia, çlirimin e vendit nga krimi dhe kthimin e saj te zotët e saj të vërtetë që jeni ju qytetarët e lirë shqiptarë”, u shpreh Basha.
Kreu i PD apelon sërish ndaj të gjithë qytetarëve që të bashkohen më 16 shkurt në Tiranë, në protestën e madhe të paralajmëruar nga opozita.
“Dëshpërimi, dyshimi, mosbesimi janë armët e fundit të kësaj bande në pushtet. Ju ftoj më 16 shkurt të vini të gjithë në Tiranë, dhe t’ia hedhim në Lanë këto armë bashkë me propagandën që të gjithë bashkë të rindezim motorët e ekonomisë përmes lirive, mundësive dhe punësimit që do ti bëjmë realitet me planin tonë ekonomik”, u shpreh ai.
