Një ditë pasi një 31-vjeçar i dha fund jetës, është zbardhur dinamika e kësaj ngjarje të rëndë. 31-vjeçari Arjan Hoxha, tri ditë më parë kishte debatuar me vjehrrën dhe bashkëshorten, madje i kishte kërkuar kësaj të fundit të kthehej pranë tij, bashkë me vajzën 1-vjeçare.
Ky debat vinte dy ditë pasi bashkëshortja kishte marrë nga Gjykata e Rrethit Gjyqësor Mat urdhër mbrojtje, pasi Hoxha e dhunonte herë pas here gruan e tij. Nga ana tjetër, vetë 31-vjeçari ishte shpallur në kërkim nga policia, për veprën penale “Dhunë në familje”.
Mesditën e djeshme, i ndjeri kishte udhëtuar nga qyteti i Klosit drejt fshatit Plan i Bardhë. Ai kishte hyrë me një armë në dorë në banesën e familjes Ndoj. Sapo janë dëgjuar zënkat, fqinjët i kanë telefonuar policisë së Klosit, duke thënë se “Një person me armë ka hyrë në shtëpinë e Xh.Ndojit”. Fillimisht ka debatuar me vjehrrën dhe pastaj edhe me gruan, madje këtë të fundit, sipas dëshmive, e ka goditur me grushte e shkelma, madje e ka shtrënguar me duar në fyt.
Pasi ka parë që policia po afrohej, duke u larguar nga shtëpia buzë ‘Rrugës së Arbrit’, Hoxha ka thirrur me zë të lartë “Nuk do t’më shohësh më të gjallë, do të vras veten”, dhe pas kësaj, brenda pak minutave është dëgjuar një krismë arme.
