“Çështja e liberalizimit të vizave, duhet të shkojë përpara”. Kështu u shpreh sot kancelari gjerman, Olaf Scholz në konferencën për media, pas takimit me kryeministrin e Kosovës, Albin Kurti. Duke qëndruar në të njëjtën linjë, ai paralajmëroi se do të angazhohen që liberalizimi i vizave të ndodhë sa më shpejtë, pasi Kosova i ka plotësuar kriteret.
“Takimi i serishëm pas një muaji tregon sa të ngushta janë marrëdhëniet tona bilaterale… Çështja e liberalizimit të vizave duhet të shkojë përpara… Ne do të angazhohemi që liberalizimi i vizave të ndodhë sa më shpejtë, pasi Kosova i ka plotësuar kriteret. Për këtë do të flasim me të gjithë partnerët në Evropë, në mënyrë që të binden edhe ata”, tha ai.
Duke folur për proceset integruese, kancelari gjerman pohoi se do ta rijetësojë Procesin e Berlinit, ndërsa në vjeshtë do të ftojë një konferencë në Berlin.
Ai tha se Procesi i Berlinit është një shenjë që Gjermania do të ndihmojë me të gjitha mundësitë që ka, vendet e Ballkanit Perëndimor që t’i bashkëngjiten BE-së në kohën e duhur dhe për t’i bindur ato që rruga duhet ndjekur.
Sipas tij, rruga drejt BE-së ka një shans realist, ndërkaq të gjitha vendet duhet të jenë të gatshme për kompromise pragmatike.
Kancelari gjerman foli edhe për dialogun Kosovë-Serbi, duke thënë se është shumë i rëndësishëm, ndërsa kërkoi nga të dyja palët zotim të qartë, konstruktivitet dhe pragmatizëm. “Kosova dhe Serbia përmes një marrëveshje gjithëpërfshirëse të gjejnë një zgjidhje politike. Dialogu është rruga që i hap Kosovës perspektivën evropiane…E qartë është që marrëveshja duhet të zgjidh çështjen e njohjes së Kosovës…Është e paimagjinueshme që dy vendet të bëhen anëtare të BE-së, e nuk e njohin njëra-tjetrën…”, përfundoi ai.
