Policia e Sarandës ka arrestuar dy persona, ndërsa dy të tjerë janë shpallur në kërkim.
Sipas informacioneve të marra ditën e djeshme, në qytetin e Sarandës po qarkullonin 2 automjete, të cilat dyshoheshin se po transportonin lëndë narkotike.
Pas bllokimit të tyre në lagjen nr.1, nga policia, kjo e fundit ka konstatuar një sasi me lëndë narkotike, me peshë 17 kg, e dyshuar si Cannabis Sattiva.
Droga u gjet e ndarë në 16 pako, të futura në një çantë sportive, në bagazhin e mjetit Benz-ML, me targë AA 371 ML.
Në pranga kanë përfunduar, shoferi Agron Prenga, 26 vjeç, banues në Sarandë, dhe Mariglen Hysenaj, 24 vjeç, banues në Sarandë.
Gjithashtu, dy persona kanë mundur të largohen me shpejtësi në rrugicat e qytetit. Dyshohet se autorët kishin për destinacion të lëndës narkotike, shtetin grek. Po punohet për kapjen e autorëve të shpallur në kërkim, si dhe të bashkëpunëtorëve të tjerë, të implikuar në këtë vepër penale.
