Sampdoria nxjerr jashtë loje Genoan, 10 milionë euro për të blerë “Ferraris”

Sampdoria është duke punuar për të blerë stadiumin “Ferraris” edhe pse para disa muajsh flitej që do të ishte bashkëpronarë me Genoan. Duket se skuadra “griffone” është tërhequr nga gara dhe Sampdoria e ka rrugën e lirë për të plotësuar ëndrrën e madhe për të patur një stadium të vetin. Presidenti Massimo Ferrero është gati të paguajë shumën prej 10 milionë eurosh të vendosur nga komuna për të blerë stadiumin e vetëm të qytetit bregdetar.

Komuna ka nxjerrë në shitje stadiumin dhe presidenti i Sampdorias është gati të investojë fillimisht duke paguar shumën e caktuar dhe më pas në rregullimin e brendshëm të këtij impianti sportiv. “Ne e duam një stadium për veten tonë dhe jemi gati të investojmë kudo që komuna ka dëshirë”, tha Ferrero, që duket se nuk do të lërë këtë shans t’i ikë nga duart, për të blerë stadiumin legjendar. Çka do të thotë që skuadra tjetër e qytetit, Genoa, do të duhet të paguajë qera për të luajtur në stadiumin e shtëpisë.