Kamer Qaka, mesfushori më i ri që i është bashkuar kombëtares shqiptare është duke u kërkuar nga disa ekipe të mëdha. Edhe pse ka vetëm 6 muaj që i është bashkuar ekipi rumun Politehnica Iasi, ai pritet që të ndryshojë ambient, pasi disa oferta të rëndësishme kanë ardhur në drejtim të tij. Mediat italiane raportojnë se futbollisti i datëlindjes 1995 është duke u vëzhguar me kujdes nga Sampdoria dhe Benevento.
Vetë lojtari, duke folur për “Nettavisen”, ka konfirmuar një transferim të mundshëm së shpejti: “Kam lexuar lajmet dhe kam folur me presidentin e klubit. Ai më ka thënë se transferimi im në një klub tjetër do të ishte diçka e drejtë, por do të ulemi të flasim pas përfundimit të pushimeve. Di vetëm që Braga ka bërë një ofertë konkrete, ndërsa nga Suedia thjesht kanë shfaqur interes për mua. Ka shumë gjasa që të transferohem së shpejti, klubi e di që objektivi im është të luaj në një kampionat të rëndësishëm. Nga sa kam kuptuar, për momentin ka 80% mundësi që të largohem nga Rumania”.
Mësohet se Qaka pëlqehet nga skuadra të vendeve të ndryshme, ndërkohë që vetë djaloshi është i hapur për të provuar aventura të reja: “Me stilin tim të lojës do të përshtatesha më lehtë në Spanjë, por edhe Serie A apo liga portugeze do të më pëlqenin. Janë kampionate të mëdha. Edhe menaxheri im më ka bërë me dije se mund të ketë të reja në javët e ardhshme, por më është thënë të mos e mbaj mendjen aty dhe të fokusohem te fusha e lojës”.
Edhe vetë Adrian Ambrose, president i Politehnica Iasi, duket e ka pranuar faktin se shumë shpejt do të privohet nga shërbimet e talentit të tij: “Ka disa klube të mëdha që interesohen për Qakën nga Spanja, Portugalia dhe Italia, ndërkohë që në Rumani e duan Steaua Bucuresti, CFR dhe Craiova. Do të jetë e vështirë ta mbajmë këtu, ka shumë mundësi që të largohet edhe pse do të na pëlqente të ruanim grupin e lojtarëve që kemi”, – ka deklaruar ai në një prononcim për median.
