Pas ngjarjeve që ndodhën në prag të Botërorit,ku Federata Egjiptiane e Futbollit përdori imazhin e Mohamed Salah pa autorizimin e tij, përplasjet mes tyre vazhdojnë. Është “The Sun” që zbulon letrën e dërguar nga menaxheri i sulmuesit të Liverpool për drejtuesit e federatës.
Salah ka hartuar një listë me disa kërkesa dhe në rast se nuk përmbushen ai mund japë dorëheqjen nga kombëtarja, ose do të kërkojë dorëheqjen në bllok të drejtuesve të federatës. Lista e kërkesave parashikon:
–Federata duhet të ndalojë këdo që të shkojë në dhomën e tij të hotelit dhe të kërkojë fotografi/autografe.
–Salah duhet të jetë gjithmonë i shoqëruar nga truproja, që duhet të jenë gjatë gjithë kohës jashtë dhomës së tij të hotelit.
–Të gjitha telefonatat drejt dhomës së Salah duhet të bllokohen.
–Salah nuk duhet të vihet në dispozicion të federatës për publicitet, intervista, takim me tifozët, evenimente që kanë lidhje me sponsorë apo vizita zyrtare.
–Salah duhet të merret menjëherë në aeroport nga federata dhe të dërgohet në hotel në mënyrën më të qetë të mundshme, pa tërhequr vëmendjen.
–Asnjë vartës i federatës egjiptiane nuk duhet t’i kërkojë Salah fotografi dhe autografe.
–Imazhi i Salah nuk duhet të përdoret nga asnjë prej sponsorëve të federatës.
Dhe nëse këto kushte nuk do të plotësohen brenda 2 shtatorit, sipas “The Sun”, Salah do të ishte i gatshëm të kërkonte shkarkimin e të gjithë drejtuesve të federatës, por edhe të tërhiqej nga kombëtarja. Duke parë rëndësinë që ka Faraoni për gjithë Egjiptin, ka më shumë mundësi që të jenë ata të federatës që të bëjnë valixhet.
