Ish-ministri i Brendshëm, Saimir Tahiri të cilit pritet t’i hiqet mandati, ka dalë nga banesa e tij dhe është nisur drejt Kryesisë së Kuvendit.
Ashtu siç deklaroi mbrëmë në emisionin “Opinion”, Tahiri do të marrë pjesë në mbledhjen e sotme të orës 11:00, të Këshillit të Mandateve, ku do të votohet për heqjen e mandatit të ish-ministrit të Brendshëm, për t’i hapur rrugë arrestimit të tij.
Mësohet se disa simpatizantë të Tahirit kanë mbërritur në kryesinë e Kuvendit, për t’i ofruar mbështetjen e tyre ish-ministrit.
Ndërkohë, nga ana tjetër kryeministri Rama po zhvillon një takim me anëtarët e Këshillit të Mandateve të Partisë Socialiste, pak para votimit për heqjen e mandatit të Tahirit.
Prokuroria e Krimeve të Rënda kërkoi dje autorizimin e Kuvendit për arrestimin e Tahirit.
Po ashtu, në shkresën e dërguar Kuvendit të Shqipërisë, Prokuroria për Krime të Rënda kërkon autorizimin për heqjen e imunitetit të deputetit Saimir Tahiri, në vijim të një hetimi të nisur për veprat penale të “Trafikut të narkotikëve”, kryer në bashkëpunim, në formën e posaçme të grupit të strukturuar kriminal dhe “Korrupsionit pasiv të zyrtarë të lartë shtetërore dhe të zgjedhurve vendorë”, parashikuara nga nenet 283/a/2 dhe 260 të Kodit Penal.
Kjo kërkesë vjen pas përfshirjes së Saimir Tahirit në dosjen “Habilaj”, ku deputeti dyshohet si i përfshirë në trafikun e drogës.
Prokuroria për Krime të Rënda po zhvillon hetime, në bashkëpunim me autoritetet italiane.
