Armando Sadiku u përfol se do të largohej nga Polonia për shkak të minutazhit të pakët që ka në dispozicion tek ekipi i Legia-s. Kjo gjë u raportua nga mediat polake të cilat u shprehën se janari do ta dërgonte sulmuesin shqiptar në Turqi. Sipas raportimeve në fjalë, Istanbul Basaksehir ishte paraqitur me një ofertë në zyrat e Legia Varshavës për të marrë sulmuesin që në janar. Madje, u përmenden edhe shifrat e diskutuar në këtë mes, por pas raportimit të parë nuk është thënë më asnjë fjalë më tepër për tratativat.
Për të mësuar më shumë “Eds” kontaktoi me Sadikun, të cilin e pyeti nëse është e vërtetë që mund të transferohet te kryesuesit e Superligës turke gjatë merkatos së dimrit. Vetë sulmuesi është shprehur paraprakisht nuk ka asgjë të vërtetë. “Nuk është e vërtetë që do të transferohem në Turqi. Unë vazhdoj pushimet dhe më datën 8 janar do të kthehem te Legia për të rinisur përgatitjet. Nuk kam dijeni për këto lajme”, – ka deklaruar bomberi kuqezi.
Ndërkaq, është përmendur edhe pista e huazimit të Sadikut në Turqi, për faktin se sulmuesi nuk po gjen shumë hapësira në Poloni kohët e fundit.
