Armando Sadiku ka bërë lëvizjen më të madhe në karrierë, pasi i është bashkuar Levantes në kampionatin spanjoll. Vetëm fakti që do të ketë përballë Real Madrid, Barcelonën dhe Atletico Madridin e bën atë një lojtarë më të kompletuar dhe më të fortë. Në rast se ai debuton këtë javë, do ta bëjë pikërisht përballë Real Madridit.
Sadiku ka kryer stërvitjen e parë në ditën e sotme tek ekipi i Levantes dhe ka dhënë një intervistë të shkurtër, ku ka shprehur lumturinë për këtë kalim nga Legia tek ekipi spanjoll. Atmosfera në ekip dukej mjaft pozitive dhe shqiptari është pritur mjaft mirë nga shokët e skuadrës. Po ashtu ai aty ka gjetur edhe shqiptarin tjetër Enis Bardhi, i cili është kthyer në një faktor mjaft të rëndësishëm aty.
“Jam shumë i lumtur që jam në këtë skuadër. Shokët e ekipit janë treguar shumë të mirë dhe jam i kënaqur që gjendem këtu. Skuadra më ka ndihmuar duke filluar nga dita e parë e stërvitjes. Ky është një hap i madh për karrierën time dhe jam i kënaqur që luaj në La Liga.
Kam parë disa ndeshje të këtij ekipi dhe mendoj se mund të bëjmë gjëra të mira së bashku. Bardhi është futbollist i mirë, flasim shqip dhe mund të më ndihmojë në këto ditë të para. Një përshëndetje për të gjithë përpara Levante”, është shprehur Sadiku.
