Nga Natasha Bertrand “The Atlantic”/ Prova të reja gjyqësore, të paraqitura të mërkurën e shkuar nga prokurori i posaçëm, Robert Myler, zbuluan një tjetër kompani ruse, të angazhuar aktualisht në një betejë ligjore lidhur me ndërhyrjen e saj të dyshuar në zgjedhjet presidenciale amerikane të 2016-ës, dhe që duket se ka ndërmarrë një fushatë tjetër disinformuese në fund të vitit të kaluar, këtë herë duke shenjestruar vetë Mylerin.
Sipas të dhënave në dispozocion, zyra e prokurorit special i ka dorëzuar avokatëve mbi 1 milionë faqe dëshmi për ‘Concord Management dhe Consulting’, si pjesë e procesit të zbulimit të dokuentave. Kjo kompani, akuzohet për financimin e portalit që përhap mashtrime në internet, e njohur si Agjencia e Kërkimit në Internet.
Por dikush i lidhur me kompaninë ‘Concord’, dyshohet se ka manipuluar dokumentet, dhe ua ka dhënë ato gazetarëve, duke shpresuar se dokumentet do t’i bënin njerëzit të mendonin se dëshmitë e Mylerit kundër portalit dizinformues rus dhe pronarëve të saj, janë të pavërteta. Taktika që nuk duket se bind ndokënd, përbëjnë një shembull tjetër sesi Rusia po shfrytëzon sistemin amerikan të drejtësisë, për të luftuar rivalët e saj jashtë vendit.
Ekspertët thonë se prokurorët e Kremlinit, kanë vënë në shënjestër rivalët e tyre dhe individë të tjerë të cilësuar si të dyshimrë, duke shfrytëzuar gjykatat e SHBA-së për të ndjekur pretendimet e rreme nëpërmjet “padive të ligjshme” vetëm në pamje të parë, thuhet në një raport të fundit nga Anders Aslund, një anëtar i think-tankut “Atlantic Council”.
Kur Myler paditi Conkord në shkurtin e vitit 2018, së bashku me 2 kompani të tjera, dhe 13 shtetas rusë të dyshuar për lidhje me Agjencinë e Kërkimit në Internet, dukej shumë e vështirë që aktakuza të sillte një proçes gjyqësor, pasi rusët nuk mund të ekstradohen në Shtetet e Bashkuara.
Por ‘Concord’, punësoi papritur kompaninë e njohur amerikane “Reed Smith” për t’u përballur me Myler, duke argumentuar se akuzat duhet të rrëzohen, pasi prokurori i posaçëm ishte emëruar në mënyrë të paligjshme. Gjykatësi Dabni Fridrih, ka refuzuar 2 herë të mbyllë këtë çështje, dhe kohët e fundit ka kritikuar avokatët amerikanë të ‘Concord’, për paraqitjen e dosjeve “joprofesionale, të papërshtatshme dhe joefektive”, duke e ndezur më tej betejën ligjore.
Tani, sipas fakteve të paraqitura këtë javë nga Myler, aktorët e panjohur që punojnë jashtë Rusisë, duket se kanë “armatosur” procesin e zbulimit të SHBA-së, në dobi të ‘Concord’.
Më shumë se 1.000 fotografi në faqen e internetit që publikoi dokumentet e rrjedhura, ”përputhen me ato të prodhuara në zbulim”, tha prokurori special.
Sipas Myler, dokumentet u publikuan nga një kompjuter me një IP që gjendet në Rusi, dhe kushdo që i publikoi ato kishte qartazi “qasje në të paktën disa nga zbulimet jo të ndjeshme të prodhuara nga qeveria”. Por dokumentet e falsifikuara u përzier me ato të vërteta, në një përpjekje të dukshme për të akuzuar Mylerin se po i cilëson faqet amerikane të internetit si Facebook dhe “Oçupy Democrats”, si operacione dezinformuese ruse.
Që në tetor të vitit të shkuar, ekspertët ligjorë dhe të sigurisë kombëtare, shprehën shqetësim për “ABC Neës” se qeveria ruse mund të përpiqet të përdorë procesin e zbulimit, për ta detyruar Mylerin të heqë nga hetimi, në mënyrë që të parandalojë publikimin e informacioneve të ndjeshëm të sigurisë kombëtare të Shteteve të Bashkuara.
Mark Zaid, një jurist i njohur në Uashington, i fokusuar në ligjin e sigurisë kombëtare, tha se e shihte incidentin më të fundit që përfshiu kompaninë ‘Concord’, dhe faqen mashtruese të internetit “si pjesë të një strategjie të qëndrueshme nga rusët për të penguar, dhe hedhur poshtë hetimin”.
Por rasti ‘Concord’, është vetëm një nga shembujt e këtij fenomeni. Në vitin 2017, Agjencia Sigurimit të Depozitave (DIA) në Rusi paraqiti 2 kërkesa për ndihmë juridike nga gjykatat federale në Nju Jork dhe Masaçusets, për të zbuluar 2 ish-aksionerë të “Probusinessbank” në pronësinë private të Sergej Leontiev dhe Aleskander Zhelezniak.
Leontiev dhe Zheleznyak kishin ikur në Shtetet e Bashkuara, por kjo nuk e ndaloi DIA-n nga ndjekja e tyre penale përmes gjykatave amerikane. Leontiev e kishte sulmuar Vladimir Putinin, kur njëri nga filialet e bankës, kishte tentuar të emetonte “kartën Navalni”, një kartë debiti që do t’i dhuronte një përqindje të transaksioneve një organizate anti-korrupsion, të udhëhequr nga disidenti i njohur rus Aleskei Navalni.
Banka Qendrore e Rusisë, ia hoqi menjëherë licencën “Probusinessbank”, dhe e detyroi atë të falimentojë, megjithëse ishte konsideruar si e shëndoshë financiarisht vetëm 2 muaj para se të konfiskohej. DIA nisi menjëherë shpërndarjen e aseteve të “Probusinessbank”, tek bankat miqësore me Kremlinin si “B&N Bank”.
Kur Leontiev kërkoi të shfuqizojë një padi federale kundër tij në vitin 2017, duke argumentuar se ajo ishte orkestruar nga 2 agjentë ruse, të prekur nga sanksionet sipas Aktit Magnitsky, Andrej Pavllov dhe Viktor Grin, gjykata e rrëzoi atë.
Mishel Estlund, një avokate e fokusuar në ndjekjet penale ndërkombëtare dhe ndjekjet penale të motivuara politikisht, më tha vitin e kaluar se problemi është se ndërsa gjykatat amerikane veprojnë në mirëbesim për të ndihmuar autoritetet ruse, këto të fundit shpesh nuk e bëjnë diçka të tillë.
“Gjykatat tona veprojnë, dhe mendojnë se veprojnë në të njëjtën fushë loje si rusët. Por nuk është kështu. Sistemi këtu është tërësisht ndryshe”- thotë Estlund. Nga ana e tij Myler, duket se e ka parashikuar se si rusët e lidhur me ‘Concord’ (që është pronë e Jevgeni Prigozhin, që shpesh quhet “kuzhinieri i Putinit”), mund të përpiqet të shfrytëzojnë procesin ligjor.
Në qershorin e vitit 2018 ai i kërkoi gjykatësit Fridrih, një urdhër mbrojtje që do të pengonte avokatët e ‘Concord’, të ndanin çdo dokument zbulimi me rusët e përmendur në aktakuzën e manipulimit online, si dhe me të huajt e tjerë, si avokatët jashtë Shteteve të Bashkuara.
Nëse të dhënat do të shpërndaheshin jashtë studiove ligjore amerikane, tha Myler, “individë të huaj, mund të përpiqen ta përdorin këtë rrugë si një mënyrë për të shtënë në dorë materiale sekrete, si pjesë e një përpjekjeje për mbledhjen e informacioneve të inteligjencës”. Faqja mashtruese e internetit, që synonte diskreditimin e hetimeve të tij, dështoi në përgjithësi në synimin e saj, dhe duket se dëshmoi saktësinë e parashikimit të Myler. Marrë me shkurtime. Përshtati për Tirana Today, Alket Goce
