“Britania e Madhe nuk do të jetë në gjendje të largojë shtetasit e saj nga Ukraina, nëse Rusia nis luftën”, ka paralajmëruar ministri i Forcave të Armatosura, James Heappey.
Ai i tha BBC-së se RAF “nuk do të jetë në gjendje të hyjë” dhe njerëzit atje duhet “të largohen tani”. Heappey pohoi se këshilla kishte ndryshuar, sepse Rusia ishte në një pozicion ku mund të sulmonte “pa njoftim”.
Rusia ka mohuar çdo plan për të pushtuar Ukrainën, pavarësisht se ka grumbulluar më shumë se 100.000 trupa pranë kufirit.
Të premten, Ministria e Jashtme e Mbretërisë së Bashkuar paralajmëroi shtetasit britanikë në Ukrainë që të largoheshin nga vendi brenda 48 orëve.
SHBA paralajmëroi qytetarët e saj të largoheshin – megjithëse tha se nuk e dinte nëse presidenti Vladimir Putin kishte marrë një vendim përfundimtar. Presidenti francez Emmanuel Macron dhe ai i SHBA, Joe Biden, folën me Putin të shtunën.
Sekretarja e Jashtme Liz Truss deklaroi se foli me homologun e saj amerikan, Sekretarin e Shtetit Antony Blinken dhe ndau “shqetësimet e saj akute” për agresionin ushtarak kundër Ukrainës brenda disa ditësh.
Ajo shkroi në Twitter: “Ne pajtohemi se Rusia do të përballet me pasoja masive për çdo pushtim, duke përfshirë sanksione të rënda. Rusia duhet të deeskalojë dhe të angazhohet me propozimet e NATO-s.”
Pas një telefonate me liderët botërorë të premten, kryeministri Boris Johnson tha se kishte frikë për sigurinë e Evropës dhe u kërkoi aleatëve të kishin një “paketë të rëndë sanksionesh ekonomike gati për t’u nisur” nëse Rusia sulmon, konfirmoi Downing Street.
Burimi i lajmit: BBC. Përshtatur nga Tirana Today
