Karriera e dy vëllezërve Xhaka ka diferenca të dukshme, por të dy Graniti dhe Taulanti e nisën karrierën në kampionatin zvicerian, tek Basel dhe ishin mjaft të suksesshëm. I vogëli, Graniti bëri një hap të madh në karrierë dhe ndodhet tek një nga ekipet dhe kampionatet më të forta në Botë, Arsenali, ndërsa Taulanti vijon karrierën e tij tek Baseli duke qenë një nga lojtarët më të rëndësishëm të këtij ekipi.
Në një intervistë të dhënë për UEFA.com, Taulant Xhaka, tregon ecurinë e tij tek ekipi zvicerian.
“Bashkë me vëllain tim, kemi luajtur për të gjitha ekipet zinxhirë që prej moshës 12 deri në moshën 21 vjeçare, deri kur na erdhi kërkesa për të luajtur me skuadrën e parë, të dyve, e cila na e bëri ëndrrën realitet, për të cilën jam shumë krenar”, ka thënë Taulant Xhaka për UEFA.com.
Karriera e dy vëllezërve nga Kosova i ka mbajtur gjithmonë krah njëri-tjetrit deri sa arritën të jenë profesionistë në futboll. Xhaka tregon dhe momentin si e nisi karrierën e tij që është më të vërtetë e jashtëzakonshme.
“Gjithmonë i kemi dhënë njëri-tjetrit këshilla, dhe nëse diçka shkonte keq, ai ma thoshte troç, të njëjtën gjë siç bëja dhe unë. Mendoj se kjo na ka bashkuar goxha shumë. Nisa si mbledhës topash. Ia kam dalë hap pas hapi dhe tani luaj në këtë stadium”, është shprehur Xhaka.
Ai sot do të jetë pjesë e formacionit në ndeshjen kundër Manchester Cityt në kuadër të 1/8 së finales të Ligës së Kampionëve. Për këtë sfidë ai është këshilluar me vëllain e tij Granitin, i cili është përballur me kryesuesit e kampionatit anglez.
