Sot ka nisur testimi i aplikimit të taksës për të kaluar në Rrugën e Kombit. Ky testim do të zgjasë dy javë, ndërsa qarkullimi me pagesë pritet të fillojë rreth datës 15 Prill. Tarifa që do të paguajë një drejtues veture është 5 euro për çdo kalim, dhe 10 euro për autobusët dhe kamionët.
Ministria e Transportit dhe Infrastrukturës ka reaguar pas lajmin se nga sot nis testimi i pagesës për çdo automjet që do kalojë në Rrugën e Kombit.
“Ajo cka ben koncesionari tani eshte qe ne perfundim te procesit te instalimit te pikave te pageses fillon testimin e sistemit”, thuhet në reagim.
Në Marrëveshjen e koncesionit, datë 6.12.2016 “Për ndërtim, përmirësim, shfrytëzim, mirëmbajtje të Autostradës Milot Morinë”, miratuar me VKM nr.870, datë 14.12.2016 “Për miratimin e kontratës se koncesionit, “Për ndërtimin, përmirësimin, shfrytëzimin dhe mirëmbajtjen e autostradës Milot – Morine”, ndërmjet Republikës se Shqipërisë, të përfaqësuar nga Ministria e Transportit dhe Infrastrukturës, dhe Konsoriumit “Catalyst Viva Das General Contracting, LLC-Salillari shpk – Bee Tech-Violiap Ateve – Kastrati sh.a., ndër të tjera parashikohet se:
Koncesionari përdor një shesh me dy kahe për pagimin e taksës ne afërsi të tunelit të Thirrës dhe Koncesionari mbledh dhe mban të ardhurat nga taksa e rrugës.
Objektivi kryesor i këtij projekti Koncesion/PPP i punimeve dhe shërbimeve është përmirësimi i Autostradës dhe shfrytëzimi dhe mirëmbajtja efikase e saj. Koncesionari do të përmirësojë, operojë dhe mirëmbajë Autostradën sipas një pakete të paracaktuar të standardeve të performancës për një periudhë 30 vjeçare të koncesionit.
Taksa e rrugës karakterizohet dhe taksohet sipas përllogaritjes se klauzolës se kontratës se koncesionit, në varësi të klasës së automjetit në bazë të klasifikimit të Automjeteve.
