Një nga të arrestuarit e superaksionit “Vol-Vo4”, Astrit Avdyli, ka apeluar vendimin e masës së sigurisë “arrest me burg”. Gjatë seancës ku ka kërkuar lirimin, Avdyli ka deklaruar se hallet i qan në Partinë Socialiste.
“Rroftë Dako, rroftë PS-ja, aty i qaj hallet”, ka qenë kjo deklarata e Astrit Avdylit në Gjykatën e Krimeve të Rënda.
Ndërsa në Gjykatën e Apelit për Krime të Rënda vijon seanca në ngarkim të dy ish-deputetëve Arben Çuko e Arben Ndoka dhe 23 të arrestuarve të tjerë gjatë operacionit “Vol-Vo 4”.
Ata kanë ankimuar vendimin e gjykatës së shkallës së parë për krime të rënda të datës 24 Tetor, që i la me masën e sigurisë “arrest në burg”. Dy ish-deputetët nuk janë të pranishëm sot në seancë, por përfaqësohen nga avokatët e tyre mbrojtës.
24 nga 34 të arrestuarit në “Vol -Vo 4”, përfshirë edhe dy- ish deputetët janë lënë me masën e sigurisë “arrest në burg”.
Ndërsa për 8 të tjerë gjykata e shkallës së parë kishte caktuar “arrest shtëpie”. Sakaq, për dy gra gjykata kishte vendosur masën e sigurisë “detyrim paraqitjeje”.
Mes të arrestuarve janë dhe disa pjestarë të bandës së Avdulajve në Shijak.
