Ish-nënkryetari i Bashkisë së Tiranës Enno Bozdo ka reaguar në lidhje me njoftimin e Entit Rregullator të Ujit, për miratimin e çmimeve të reja të ujit të pijshëm për kryeqytetin. Sipas Bozdos, çmimi i ujit u rrit në mënyrë të çuditshme.
“ERRU çuditërisht vendos të rrisë çmimin e ujit në Tiranë. Pavarësisht se UKT i ka humbjet në rrjet mbi 70%. Do të mjaftonte reduktimi i këtyre humbjeve që çmimi jo vetëm të mos rritej, por madje të ulej. ERRU, si rregull, duhet ta detyrojë UKT më parë të ulë humbjet. Por ERRU i bën fresk politikës së ditës, jo qytetarëve. Në qoftë se UKT do kishte një plan biznesi serioz, çdo bankë do ta financonte, pa pasur nevojë të rritet aspak çmimi ujit. P.S. Ndërkaq Veliaj ka dy vjet që mburret se e ka përmirësuar ndjeshëm menaxhimin e UKT. Por qartazi gënjen! Me sa duket, do ta japin me koncesion. Por më parë po e kthejnë në fitimprurëse….sigurisht me lekët tona”, shprehet ish-nënkryetari i Bashkisë Tiranë.
Ndërkohë me tarifat e reja, të cilat hyjnë në fuqi në datën 1 janar 2018, uji i pijshëm rritet nga 45 lekë për m3, në 65 lekë/m3. Çmimi i ujit për bizneset ishte 135 lekë, ndërsa me tarifën e re do jetë 155 lekë/m3. Ndërsa për furrat e bukës do jetë 95 lekë për metër kub.
