Kryebashkiaku i Tiranës, Erion Veliaj ka sqaruar sot se ka propozuar rritjen e çmimit të ujit, në mënyrë që Bashkia të mund të marrë kredi në të ardhmen që të sigurojë investime që e furnizojnë Tiranën me 24 orë ujë.
Teksa ishte i ftuar në emisionin e mëngjesit “Koha për t’u zgjuar” në News 24, Veliaj tha se konsumatorët familjarë do të paguajnë të paktën sa banorët e Kamzës:
“Çmimi do të rritet të paktën sa për banorët e Kamzës. S’mund të paguhet uji më shtrenjtë në Bathore se sa në Kamëz. Sigurisht ai që ka pishinë të matet mirë dhe ai që vadit tokën me ujin e pijshëm. Në Paskuqan e Babrru iu intereson më mirë ta lidhin zorrën e ujit në Tiranë, uji këtu është aq lirë sa iu leverdis. Ne po flasim për 20 lekë”, sqaroi Veliaj.
E gjitha kjo sipas Veliajt, bëhet që Bashkia të mund të marrë kredi që të zhbllokojë ujësjellësin. Ai shtoi më tej se, të gjithë konsumatorët e kryeqytetit do të paguajnë më pak se sa kostoja e një gazete.
“Nuk po shkojmë tek mesatarja e Shqipërisë, as tek Durrësi e Korça, por tek Kamza”, tha kryebashkiaku.
Sipas propozimit të Bashkisë, çmimi i ujit në Tiranë do të rritet nga 45 lek/ m3 në 65 lekë/m3 për familjarët dhe nga 135 lekë/m3 në 190 lekë/m3 për bizneset.
