Pagesa e ndihmës ekonomike do të rritet deri në 8000 lekë që prej janarit të 2018-ës.
Kështu deklaroi ministrja e Shëndetësisë dhe Mbrojtjes Sociale, Ogerta Manastirliu gjatë një vizite në një familje, që trajtohet me skemën e ndihmës ekonomike në Llakatund të Vlorës.
Gjithashtu, Manastirliu tha se me krijimin e regjistrit elektronik kombëtar dhe verifikimit automatik me institucionet do të shmangen procedurat e gjata për aplikim dhe do të eliminohen abuzimet me këtë skemë:
Skema e re e ndihmës ekonomike e cila do të shtrihet në Shqipëri në Janar të vitit 2018, nuk do të ketë më kritere përjashtuese për familjet në nevojë, duke targetuar familjet më në nevojë. Kjo skemë do të rrisë pagesat e ndihmës ekonomike, deri në 8000 lekë dhe falë krijimit të regjistrit elektronik kombëtar dhe verifikimit automatik me institucionet do të shmangë procedurat e gjata për aplikim dhe do të eliminojë abuzimet me këtë skemë.
Qendra Shëndetësore Shushicë në Llakatund i shërben 9800 banorëve të kësaj zone dhe është rikonstruktuar me një vlerë prej 12 milion lekë, ku përfshihet rehabilitimi i rrjetit të ujësjellësit, rrjetit elektrik dhe rehabilitimi i ambienteve ndihmëse.
