Paga minimale do të rritet me 2 mijë lekë. Kështu është shprehur ministri Arben Ahmetaj, i cili tha se Këshilli i Ministrave pritet të aprovojë rritjen e pagës minimale nga 22 mijë lekë në 24 mijë lekë.
Ministri i financave ishte në Komisionin e Ekonomisë, ku prezantoi uljen e TVSH-së për akomodimin në turizëm, nga 20 në 6 për qind, gjë që pritet të nxisë këtë sektor.
“Unë besoj se, menjëherë pas kalimit të ligjit, do të kalojmë në një fushatë formalizimi të sektorit të turizmit dhe besoj se do të shoqërohet edhe me një regjistrim të detajuar të të gjithë shtretërve në Republikën e Shqipërisë”, deklaroi më tej Ahmetaj, shkruan TCH.
Ndryshimet u miratuan nga komisioni, ndërkohë që pas hyrjes në fuqi të ligjit, do të dalin menjëherë aktet nënligjore.
