Një aeroplan i vogël është rrëzuar në Lindjen e Largët të Rusisë, ku për pasojë kanë humbur jetën 6 pasagjerë.
Sipas medieve ruse, në aeroplan kanë qenë duke udhëtuar 7 persona, mes të cilëve i vetmi i mbijetuar është një 4-vjeçar.
Aeroplani u rrëzua pak para se të niste uljen në aeroportin lokal në fshatin Nelkan, mbi 1.000 kilometra nga qyteti Khabarovsk. Sipas autoriteteve, 2 nga personat që ndodheshin në aeroplan ishin anëtarë të ekuipazhit.
Aksidenti ndodhi në orët e para të së mërkurës, ndërsa aeroplani ishte një Let L-410 me një kapacitet maksimal prej 19 pasagjerësh dhe ishte në pronësi të Khabarovsk Airlines.
Autoritetet e aviacionit humbën kontaktin me aeroplanin rreth 2 kilometra larg aeroportit, raporton Ministria e Emergjencave.
Ekipet e zjarrit dhe shpëtimit, si dhe ambulancat u dërguan në vendin e rrëzimit. Aeroplani u dëmtua nga rënia, por nuk mori flakë, shtoi ministria.
Ekspertët po shohin tre shkaqe të mundshme të rrëzimit, duke përfshirë kushtet e vështira të motit, gabimet e pilotit ose çështjet teknike, tha dega e Lindjes së Largët të Komisionit Hetimor të Rusisë.
Megjithatë, një përfaqësues i shërbimit të parashikimit të motit të Rusisë në Lindjen e Largët thotë se kushtet e motit në fshat nuk përbënin ndonjë problem.
“Nuk kishte dëborë, era frynte në 3-4 m/s, nuk kishte mjegull, dukshmëria ishte e mirë,” tha përfaqësues i shërbimit të parashikimit të motit.
Një helikopter mjekësor e dërgoi fëmijën e mbijetuar në një spital, rreth 500 km larg fshatit./ Tirana Today
