Andesi ka një periudhë inkubacioni prej 6 javësh dhe pritet të ketë raste të tjera të infektuara. Mjeku infeksionist Prof. Dr. Arjan Harxhi shpjegon përse pas disa ditësh po shfaqen persona të tjerë të infektuar si në Itali, Francë, Angli e Zvicër.
“Do të kemi raste të tjera sepse nuk është mbyllur cikli. Ka një periudhë të gjatë inkubacioni deri në 6 javë”, tha ai.
Por a rrezikon Shqipëria nga varianti Andes i Hantavirusit, pasi një lloj i tij është i njohur në vendin tonë si ethe hemorragjike?
“Nuk mund të them që Shqipëria nuk rrezikon, sepse në anije p.sh. ka qenë edhe një shtetas nga Mali i Zi”, u shpreh mjeku.
Por si nis të shfaqet sëmundja tek njeriu?
Prof. Harxhi shpjegon se Hantavirusi përhapet nga miu tek njeriu, por vetëm lloji Andes përhapet nga njeriu tek njeriu, jo aq shpesh sa Covid.
Personat duhet të qëndrojnë bashkë për një kohë të gjatë në të njëjtin ambient të mbyllur. Harxhi shpjegon se nuk ka vend për panik, pasi bashkë me shpërthimin e virusit ka nisur edhe infodemia.
