Shtohet frika e familjarëve për jetën e gazetarit Roman Protasevich që u rrëmbye në kryeqytetin bjellorus pas urdhërit të presidentit Lukashenko. Gazetari Protasevich dhe e dashura e tij ruse, Sofia Sapega, prej dy ditësh ndodhen në paraburgim, ndërsa nëna e tij bën thirrje për shpëtimin e tij. “Unë i bëj thirrje gjithë bashkësisë ndërkombëtare për ta shpëtuar tim bir”, ka thënë nëna e tij Natalia Protasevich, duke shprehur frikën për jetën e të birit. Dyshimet e familjarëve janë se ai mund të flasë i detyruar nga autoritetet sikur është trajtuar mirë.
Sapega dhe Protasevich u arrestuan të dielën e 23 majit, kur një aeroplan që fluturonte nga Athina në Vilnius, në Lituaninë fqinje, u devijua për të ndaluar në Minsk, kryeqytetin bjellorus. Ndërkohë në lidhje me këtë incident kanë reaguar vendet perëndimore të cilat akuzojnë Bjellorusinë për rrëmbimin e avionit Ryanair që u ridrejtua pas një kërcënimi të supozuar për shpërthim bombe. “Sofia u mor në pyetje. Ajo u akuzua për kryerjen e një vepre penale. U zgjodh një masë parandaluese – paraburgimi për një periudhë prej dy muajsh, “i tha avokati i saj, Alexander Filanovich shërbimin rus të BBC një ditë më parë. Sapega tani është në një qendër paraburgimi të KGB në kryeqytetin bjellorus, tha ai.
Reagimet për arrestimin
BE ka kërkuar lirimin e gazetarit të arrestuar nga Bjellorusia Roman Protasevich dhe të partneres së tij, Sofia Sapega. Avioni në të cilin udhëtonte gazetari i opozitës u detyrua të ulej në Minsk pas urdhrit të Lukashenko-s. Në përgjigje të veprimit të udhëheqësit bjellorus Lukashenko, BE ka vendosur të ndalojë fluturimin e linjave ajrore Bjelloruse në hapësirën ajrore europiane. Në një takim në Bruksel, udhëheqësit e 27 vendeve anëtare gjithashtu u kërkuan linjave ajrore të BE të mos fluturonin mbi hapësirën ajrore të Bjellorusisë dhe theksuan se do të vendosnin sanksione të mëtejshme ekonomike .
Roman Protasevich, 26 vjeç, po udhëtonte nga Greqia për në Lituani, por më pas avioni i tij u detyrua të ulej në Minsk pas alarmit fals për një bombë. Vendet perëndimore akuzuan Bjellorusinë për rrëmbimin e avionit të Ryanair. Autoritetet e Bjellorusisë publikuan të hënën videon e Protasevich, në të cilën gazetari detyrohet të zbresë më forcë nga avioni. Në video, gazetari tha se ishte mirë me shëndet dhe me sa duket rrëfeu për krimet për të cilat ishte akuzuar nga shteti Bjellorus. Por aktivistët, përfshirë udhëheqësin kryesor të opozitës së vendit, thanë se Protasevich ishte nën presion nga autoritetet bjelloruse.
Presidenti i SHBA-së Joe Biden i përshkroi veprimet e autoriteteve Bjelloruse të dhunshme duke thënë se ato ishin “sulme të turpshme si ndaj disidencës politike dhe lirisë së shtypit”.
Kundërshtar i flaktë i presidentit të Bjellorusisë, Protasevich u vendos në listën e ”individëve të përfshirë në veprimtari terroriste” nga vendi, për rolin e tij në protestat masive vitin e kaluar. Me akuzën e shkaktimin e trazirave masive, ai mund të dënohet me deri në 15 vjet burg./ Tirana Today
