Një biznesmen i njohur grek është rrëmbyer mëngjesin e sotëm në Pire, rreth orës 09:00. Sipas mediave greke, biznesmeni po shkonte në punë, kur është rrëmbyer nga 4 persona me veshje me stampën e dukshme EKAM, ndërsa më mes të rrugës e kanë futur me forcë në një makinë tip ‘Volkswagen’.
Dëshmitarët e ngjarjes thonë se rrëmbimi ngjante me një skenë të një filmi hollivudian. Familjarët e biznesmenit kanë thënë për policinë se nuk kanë marrë asnjë informacion apo telefonatë ende nga askush.
Mësohet se biznesmeni N.M. është tepër i njohur në Greqi, familja zotëron biznesin më të njohur të produkteve pa tatime që kryesisht furnizojnë ambasadat dhe njësitë shitëse të zonave kufitare.
Po ashtu, ai është president i një klubi në Pire. Autoritetet e policisë po shqyrtojnë të gjitha mundësitë e rrëmbimit, që nga biznesi tek konfliktet që mund të ketë pasur.
