Ngjarja e rëndë e vrasjes së 28-vjeçares Anxhelina në Greqi nga babai i saj, në familjen e nënës që jeton në Berat, është mësuar vetëm nëpërmjet mediave.
Detaje të reja zbulohen pas vrasjes së 28-vjeçares. Prindërit ishin divorcuar disa vite më parë dhe Anxhelina Petro jetonte me babanë e saj Aleko Petro në Alepou të Korfuzit. Pjesa tjetër e familjes ndodhet në Berat.
Pas ngjarjes, nëna e vajzës, Xhezmije Hoxhallari shprehet se të bijën, Anxhelinën nuk e shihte prej 12 vitesh, ndërsa me të bisedonte në telefon. Ajo kërkon ndihmë për kthimin e trupit në Berat, ndërsa ka edhe një apel për drejtësinë greke që të japë dënimin e merituar për ish-bashkëshortin e saj.
“Kisha 12 vite që nuk e shihja vajzën. Vetëm flisnim në telefon. Apeli im është që trupi i vajzës të kthehet në Berat për varrimin. Drejtësia të vihet në vend për ish-bashkëshortin”, shprehet Xhezmije Hoxhallari, nëna e Anxhelina Petros.
Sipas mediave greke, motiv për vrasjen makabër ka qenë lidhja e 28-vjeçares shqiptare me një të ri afgan, lidhje të cilën nuk e pranonte babai i saj, Aleko Petro. Burri 52-vjeçar mësohet se e ka goditur vajzën disa herë me një shufër hekuri në kokë duke i shkaktuar vdekjen e menjëhershme dhe më pas trupin e pajetë të të bijës e ka groposur në kopshtin pas shtëpisë për të humbur gjurmët.
