Dhuna dhe vesi për të luajtur bixhoz, është bërë shkak që Violeta Donaj ti merrte jetën bashkëshortit të saj. Kështu ka deklaruar nëna e dy fëmijëve, ndërsa ka treguar edhe se ku e ka marrë armën. Ajo ka thënë para policëve se armën e kishte marrë tek makina që burrë e grua përdornin për nevojat e familjes, por pa përcaktuar nëse arma i përkiste vetë viktimës. Po kështu, Violeta është rrëfyer se ajo ishte e lodhur nga sjellja e të ndjerit, pasi në jo pak raste, i kishte shkaktuar probleme ekonomike, e më pas ishte bërë shumë xheloz.
“Nuk e di sesi e bëra, thjesht kujtoj që mora pistoletën dhe e qëllova. Isha e lodhur nga sjellja e tij, duke luajtur bixhoz dhe duke na krijuar probleme ekonomike e më pas ishte bërë shumë xheloz.
U takuam për të vijuar si çdo herë punën tonë, por patëm një debat dhe unë kam hyrë në makinë (familjare), aty kam gjetur pistoletën, të cilën e mora me vete dhe shkova te tregu dhe e kam qëlluar.
Nuk e dija se çfarë po bëja, por e kam parë bashkëshortin e shtrirë dhe kuptova se i kisha dhënë fund gjithçkaje, edhe jetës së familjes sonë.
Fillova të dridhesha dhe më pas e kam parë veten të futur në një makinë, derisa erdhi policia.
Kishim probleme. Mundohesha t’i fshihja, duke menduar se gjërat do të rregulloheshin, por nuk ndodhi. Ajo që bëra ishte një moment dobësie dhe lodhje e madhe, duke e përjetuar problemin në familjen tonë”, u ka thënë ajo hetuesve.
