Ardian Ismajli, ish-kapiteni i përfaqësueses së Kosovës U-21 iu bashkua kuqezinjve për dy ndeshjet e radhës. Një lëvizje që ka krijuar shumë diskutim në javët e fundit. Në një rrëfim për “Kallxo.com”, qendërmbrojtësi ka folur për arsyet e zgjedhjes së tij. Ai e ka quajtur privilegj që do të luaj në ngjyrat e flamurit kuq e zi.
“Ka qenë një ëndërr e imja që t’i përfaqësoj shqiptarët, nga Kosova, Maqedonia, Presheva dhe Mali i Zi. Jam i privilegjuar që luaj për flamurin kuq e zi që i përfaqëson të gjithë. Që nga marsi i këtij viti kam pasur kërkesë që të jem pjesë e Shqipërisë. Panuçi e ka pëlqyer stilin tim të lojës dhe ka shprehur dëshirën të jem atje”, ka zbuluar Ismajli.
Gjithashtu ai ka folur edhe për atë që ndodhi te kombëtarja e Kosovës që pas vdekjes së Fadil Vokrrit. Sekretari i Federatës së Futbollit të Kosovës, Eroll Salihu u shpreh se Imsajli ka bërë shantazh që të jetë pjesë e formacionit të Kosovës.
“Më vjen shumë keq kur dëgjova deklarata si ato të Salihut, sepse ai më njeh mirë dhe e dinë të gjithë atë që ka ndodhur, por do t’ia lëmë kohës. Me vdekjen e Vokrrit, ndryshuar gjërat në FFK. Unë nuk e kam thyer premtimin, por u thye puna e të ndjerit. Te Shqipëria më kanë pritur mirë dhe më kanë uruar mirëseardhjen. Për sa i përket formacionit ajo është punë e trajnerit”, përfundon Ismajli.
