Igli Tare është duke shkruar një faqe në historinë e futbollit me suksesin që po korr si Drejtor Sportiv në ekipin e Lacios. Transferimet e goditura me një shumë modeste dhe që janë kthyer në lojtarë me vlerë miliona eurosh e ka bërë që të jetë më i miri në Itali.
Ndodhemi në një periudhë merkatoje dhe pritet që tare të rinovojë kontratën me lacialët, gjë që për ish sulmuesin e kombëtares shqiptare është thjeshtë një formalitet. “Është mendimi i fundit që me vjen në kokë, për mua është vetëm një formalitet. Me presidentin Lotito kam një raport besimi reciprok. Më është dashur që të bëj gjithçka i vetëm. Nuk ka qenë e lehtë, pasi nuk kisha eksperiencë dhe mbi të gjitha askush nuk besonte te unë. Merita është e presidentit Lotito, pasi pa përtej besimit për të bërë këtë detyrë”, deklaroi Tare në një intervistë për Radio 6.
Në gjithë këto vite ka patur shumë beje të rëndësishme firmosur nga dora e Tares, por mbi të gjitha qëndron një emër, që ai nuk e mban sekret. “Sigurisht Milinkovic Savic. Jo vetëm se është një prej talenteve më të mira që qarkullojnë sot në futbollin evropian, por edhe sepse arrita që të finalizoj një marrëveshje besimi që në fillim. Nuk ka as më të voglin dyshim që ky është Lacio më i fortë që kam ngritur”.
Në një detyrë të tillë padyshim jo të gjitha realizohen dhe për Taren ka një keqardhje në shumë emra që kanë qarkulluar: “Padyshim keqardhja më e madhe është Cavani. Në atë periudhë nuk kishte politka të sakta për të realizuar një transferim nga Palermo te Lacio”.
Ndërkohë duke qëndruar tek e tashmja, Tare ka në duar një kontratë që nuk e ka mbyllur ende dhe është pikërisht ajo e qendërmbrojtësit holandez De Vrij. “Është e rëndësishme që të kemi grupin të bashkuar. Kritikat janë gjithnjë konstruktive. Është e gabuar të pranosh me kokë ulur, pas vështirësive të para. Por edhe kjo rrit kualitetin. De Vrij do të qëndrojë dhe do ta shihni që kështu do të jetë”, përfundoi Tare.
