Juventusi ka ngecur sërish në përballjen që në letër dukej e lehtë përballë Crotones së Arlind Ajetit. Ishte një roveshatë e pabesueshme nga Simy, që anulon golin e Alex Sandros dhe rihap titullin e Serie A. Një ndeshje shumë e luftuar ku fati dhe mrekullitë e portierit të Crotones bëri që ndeshja të mbyllej në barazim. Kjo do të thotë se kur kanë mbetur katër javë para fundit, Juventus kryeson me katër pikë më shumë se Napoli i vendit të dytë.
Napoli ka fituar me përmbysje 4-2 ndaj Udinese duke i shkaktuar humbjen e nëntë radhazi kësaj skuadre. Udinese shënoi dy herë e para, por Napoli barazoi në të dyja raste dhe më pas mbylli gjithçka duke kompletuar “pokerin” me golat e Milik dhe Tonelli. Skuadra e Sarri i ka shpresat e fundit për titull në përballjen direkte me bardhezinjtë në “Juventus Stadium”, fundjavën e ardhshme.
Ndërkohë, Roma dhe Lazio kanë fituar ndeshjet përkatëse duke u konfirmuar në vendin e tretë, me një pikë më shumë se Inter, që 24 orë më parë mposhti Cagliari, 4-0 në “San Siro”. Fitorja e Lazio ishte “epike”, pasi bardhezikaltërit po humbnin 3-2 në fushën e Fiorentina, pas një ore lojë, por arritën të përmbysin gjithçka me një fitore 4-3, kur të dyja ekipet ishin me dhjetë futbollistë në fushën e lojës. Roma fitoi 2-1 ndaj Genoa, ndërsa Milan i jep përfundimisht lamtumirë shanseve për një vend në Champions, pas barazimit 1-1 në Torino.
Belotti humbi një penallti për vendasit në minutat e para të ndeshjes, ndërsa kuqezinjtë kaluan në avantazh pak më vonë me golin nga jashtë zone të Bonaventura. Ky ishte goli i shtatë i Milan në dhjetë minutat e para të ndeshjes gjatë këtij sezoni. Rekord. Gjithsesi, 20 minuta para fundit, Torino barazoi me anë të De Silvestri. Diku gjetkë, Sampdoria fitoi 1-0 ndaj Bologna, Sassuolo fitoi me të njëjtën rezultat në fushën e Verona, ndërsa SPAL-Chievo u mbyll 0-0.
