Cristiano Ronaldo duket se e ka mbyllur aventurën e tij tek Real Madrid, pasi së fundmi ka refuzuar rinovimin e kontratës me pagë 32 milionë euro në sezon. Ylli portugez e kishte paralajmëruar largimin nga madrilenët që pas finales së Champions League, por më pas i qetësoi zërat.
Pesë herë fituesi i “Topit të Artë” nuk është i lumtur në Madrid, pasi presidenti Florentino Perez e ka zhgënjyer kur i premtoi rinovim dhe më pas nuk e mbajti fjalën. Thuhet se Ronaldo i kishte kërkuar një përmirësim rroge, që të arrinte Messin dhe Neymar por madrilenët ishin shprehur se nuk e përballonin.
Ndërsa gazetari spanjoll, José Ramón ka bërë të ditur se Real Madridi tashmë është i vendosur t`i dëgjojë ofertat të cilat vijnë në drejtim të tyre për shitjen e Cristiano Ronaldos.
“Cristiano është pjesë e merkatos së futbollit”, tha gazetari Ramon. Këto komente gazetari i bëri në emisionin “El Transistor” ku ishte i ftuar të fliste rreth fjalëve të fundit se Perez ka ulur klauzolën e CR7 nga 1 miliardë euro sa ishte në 120 milionë.
Pas 9 viteve qëndrimi te Real Madridi, duket se Cristiano kësaj radhe do të largohet nga klubi Madrilen, por gjithnjë sipas këtij gazetari spanjoll jo me çfarëdo çmimi. Ramon siguroi se ekipet që e duan CR7 në radhët e veta nuk do të duhet të paguajnë as 1 miliardë euro e as 120 milionë euro siç flitet, por ai nuk përmendi ndonjë shifër tjetër konkrete.
Në “pole position” për ta blerë futbollistin duket Manchester United por zërat e fundit të merkatos thonë se ai mund të transferohet te Juventusi ose te PSG. Agjenti i tij Jorge Mendes është në lëvizje për të transferuar klientin e tij.
