Fituesi i medaljes së bronzit, Erkand Qerimaj, ka komentuar heqjen e medaljes së arit të Begajt, e cila rezultoi e dopuar.
I ftuar në emisionin “Wake Up”, Qerimaj ka fajësuar ministrinë e Arsimit, Sportit dhe Rinisë, si dhe Federatën Shqiptare të Peshëngritjes, të cilat sipas tij, nuk morën masa për ta parandaluar këtë skandal.
Madje, duke iu referuar rastit të parë të skandalit me dopingun, Qerimaj tha se federata nuk duhej të kishte lejuar Begajn që të stërvitej sërish në Greqi, meqenëse herën e parë, u fajësuan grekët për rastin, raporton Tirana Today.
“A ishte faji i grekëve hera e parë, pse e le me shku prapë në Greqi? Pastaj ministria dhe Federata, pse nuk bën kontrollet përkatëse? Mund të ishte parandaluar kjo!”, tha Qerimaj.
Peshëngritësi po ashtu u ndje në siklet teksa duhej të përgjigjej për kolegen e tij shqiptare, teksa tha:
“Kjo situata është si tenxherja që vlon, pse duhet të përgjigjem unë për kolegen time. Nuk është përgjegjësia ime se ça bën një koleg. Se në dy lajme, lajmi i keq bën më shumë bujë.”
I pyetur nëse do të shpërblehet pasi fitoi medaljen e bronzit në Botëror, Qerimaj u shpreh se i takonte shpërblimi, i cili në fakt do të ishte stimul edhe për sportistët e tjerë:
Normalisht duhet të paguhem, aty thotë deri në vendin e 5-të në botë, unë jam i treti. Duhet ta marr shpërblimin! Nuk është problemi vetëm nëse e marr unë ose jo shpërblimin, por kur një sportist sheh që një tjetër nuk shpërblehet as pas 15 vitesh punë, ata heqin dorë nga sporti sepse demoralizohen. Përveç kësaj, duhet të përcjellim pak pozitivitet! TIRANA TODAY
