Ylli holandez i Bayern Munich, Arjen Robben në fund të sezonit do të jetë një futbollist i lirë. Por duket se Interi është vënë në kontakt me babanë e futbollistit, që është edhe agjenti i tij, për të përfituar nga kjo situatë. Beppe Marotta ka zhvilluar kontaktet e para për të kuptuar më qartë se si qëndron situata e 35-vjeçarit.
Në një intervistë për media Robben është vënë në dijeni të interesit të Inter dhe e ka pritur me mirësjellje si mundësi për të ardhmen e tij.
“Me të vërtetë”, tha holandezi, “Jam shumë krenar dhe i lumtur që po marr oferta. Javët e fundit kanë qenë shumë intensive, sidomos për babanë tim, i cili është agjenti im, por është bukur të dëgjosh që ka klube që interesohen”, shtoi ai.
“Për mua, e ardhmja është akoma e hapur. Ende jam duke pritur. Dua të pres dhe të fokusohem që të jem në formë, të rikthehem në skuadër dhe të luaj futboll. Nuk e di kur, por do të marr një vendim. Nuk do të pres deri në fund të sezonit sepse kam familje dhe duhet ta planifikoj lëvizjen fillimisht.
E përsëris, jam i privilegjuar dhe me fat që klube të mëdha kanë shfaqur interes për mua”, përfundoi Robben.
