Rivlerësimi i pasurive të paluajtshme me tatim 5% – Çfarë duhet të dini
Është hapur zyrtarisht procesi i rivlerësimit të pasurive të paluajtshme për individët, me një tatim të reduktuar prej vetëm 5%, nga 15% që është aktualisht.
Sipas udhëzimit të publikuar në Fletoren Zyrtare nga Ministria e Financave dhe Agjencia Shtetërore e Kadastrës, të gjithë individët që kanë në pronësi tokë apo ndërtesë të regjistruar – ose që e regjistrojnë deri më 31 dhjetor 2026 – mund të përfitojnë nga ky rivlerësim.
Si funksionon?
Individi ka dy mundësi:
E para, rivlerësimi të bëhet pranë ASHK-së, bazuar në çmimet minimale fiskale në fuqi.
E dyta, rivlerësimi të kryhet nga një ekspert i licencuar, por vlera nuk mund të jetë më e ulët se çmimi minimal fiskal.
Tatimi 5% llogaritet mbi diferencën mes vlerës së re të rivlerësuar dhe vlerës së regjistruar më parë.
Për ndërtesat, nga çmimi i referencës zbritet 1% për çdo vit përdorimi, deri në maksimum 30%.
Për tokën, përdoret çmimi për metër katror sipas hartës së vlerave.
Aplikimi bëhet online përmes portalit e-Albania, duke ngarkuar dokumentacionin përkatës. Pas llogaritjes së tatimit dhe tarifës së shërbimit, bëhet pagesa dhe më pas ASHK pasqyron rivlerësimin në regjistrin e pasurive.
Afati për aplikim është deri më 31 dhjetor 2026, ndërsa pagesa mund të kryhet deri më 31 mars 2027 për aplikimet e paraqitura brenda afatit.
Ky është një mundësi e mirë për ata që planifikojnë shitjen në të ardhmen dhe duan të ulin barrën tatimore.
