Gjykata e Posaçme është tërhequr për vendimin për masën e sigurisë ndaj kryebashkiakut të Tiranës, Erion Veliaj, i cili u arrestua të hënën pasdite me urdhër të Prokurorisë së Posaçme për akuza të korrupsionit dhe pastrimit të parave. Gjykata caktoi masën e arrestit në burg për Veliajn në mungesë, ndërsa për bashkëshorten e tij, Ajola Xoxa, është vendosur masa e arrestit shtëpiak për të njëjtat akuza.
Veliaj u shoqërua nga punonjës të Policisë së Shtetit dhe agjentë të Byrosë Kombëtare të Hetimit nga Bashkia e Tiranës, për t’u izoluar derisa të dalë përballë gjykatës për t’u njohur me masën e sigurisë. Po ashtu, masa arresti në burg është lëshuar edhe për biznesmenin Elman Abule, ndërsa për 5 individë të tjerë është vendosur masa e detyrimit për t’u paraqitur në prokurori. Ata dyshohet se kanë përfituar tendera në mënyrë korruptive nga Bashkia e Tiranës.
Në mesin e të tjerëve, përfshihen biznesmenët Gentian Sula, Meriman Palushi, Fatmir Bektashi, Sokol Kryeziu dhe Shkëlqim Fusha, të cilët janë gjithashtu pjesë e hetimeve për korrupsionin dhe përfitimin e tenderave në mënyrë të paligjshme.
