“Super-classico” e madhe argjentinase, Boca Juniors-River Plate do të përballen në finalen e Kupës së Libertadores për të vendosur kush do të dominojë futbollin jo vetëm në Argjentinë, por edhe në kontinentin amerikano-latin.
Termi “Super-classico” përdoret për të përshkruar rivalitetin e dy prej klubeve më të mëdha dhe më të suksesshme të futbollit argjentinas, ku 70% e fansave të futbollit, janë tifozë me njërin prej këtyre dy ekipeve.
Kjo sfidë është mjaft e njohur në mbarë botën, pasi prodhon sfida vërtetë “të nxehta”, emocionuese dhe të luftuara shumë nga të dy skuadrat, ndërsa disa media prestigjioze ndërkombëtare e kanë përshkruar Super-classicon si derbin më të madh të futbollit botëror.
Që të dy këto klube janë themeluar në La Boca, zonën e kantiereve të klasës punëtore të kryeqytetit argjentinas, Buenos Aires, me Riverin që ekziston që prej vitit 1901 dhe Boca Juniors-in që i ka fillesat 4 vite më vonë, më 1905.
Në vitin 1905 River Plate u zhvendos në veri të qytetit, në distriktin e Nunezit dhe që prej asaj periudhe, Boca Juniors mbeti skuadra e punëtorëve, ndërsa shumica e fansave vinin nga komuniteti i emigrantëve italianë, ndaj edhe njihen ndryshe edhe me termin Xeneises (Gjenovezë).
Nga ana tjetër, Riveri njihet ndryshe si “Los Millioneros” dhe supozohet të jetë klub me bazë në shtresën e lartë shoqërore, por që të dy klubet kanë fansa nga shtresa të ndryshme shoqërore, në të gjithë vendin, ndaj një realitet i tillë nuk është se ekziston.
Përballja e parë mes Boca Juniorsit dhe Rive Plate u regjistrua më 27 Gusht 1913 dhe u fitua nga “Los Millionarios” me rezultatin 2-1, ndërsa që nga ajo periudhë të dy skuadrat janë përballur 211 herë me njëra-tjetrën në kompeticione të ndryshme.
Bilanci i Super-classicos është në favor të Boca Juniors, që ka fituar 77 përballje, kundrejt 69 triumfeve të Riverit, ndërsa 65 sfida të tjera kanë përfunduar në barazim. Edhe sa i përket golave të shënuar, “Xeneizes” kanë shënuar 288 të tillë, ndërsa rivalët e përjetshëm vetëm 270.
“Një det me pankarta shumë-ngjyrëshe, britma, ulërima, këngë, valle dhe fishek-zjarre pa fund”, shkruan BBC në përshkrimin që i bën pasionit të fansave të dy skuadrave, pasi është pikërisht ky fakt, që e bën të veçantë këtë përballje.
Tifozët e River Plate thirren “gallinas” (Pulat), nga kundërshtarët e tyre, ndërsa vetë “Los Millionarios” etiketojnë tifozërinë e Boca Juniorsit me termin “los chanchitos” (derrkucët), referuar vendndodhjes së stadiumit të tyre, në një zonë të varfër të Buenos Airesit, që kundërmon erë të keqe shpesh.
Rivaliteti mes dy skuadrave ka pasur një ndikim të madh edhe te futbollistët, veçanërisht te ata që kanë luajtur për të dy klubet, ndër të cilët Cataldo Spitale ishte i pari që la Boca-n në 1933-shin, për t’iu bashkuar Riverit.
Një tjetër futbollist që bëri të njëjtën lëvizje më 1985-ën, Oscar Ruggeri do ta përshkruante kështu këtë transferim: Mund t’ju them se nuk është aspak e lehtë. Njëra palë ju sheh si tradhtar, ndërsa pala tjetër nuk është se ju beson shumë. Duhet kohë për t’u përshtatur dhe shumë karakter i fortë, për të fituar besimin e njerëzve.
Disa vite më vonë, legjenda argjentinase e futbollit, Diego Armando Maradona, as nuk e mori në konsideratë të transferohej nga Argentinos Juniors për te River Plate, pasi theksoi se donte të luante vetëm për Boca Juniors, ëndërr që e bëri realitet pak kohë më vonë.
Fansat e të dy skuadrave përplasen me njëri-tjetrin në jo pak raste, ndërsa nuk kanë munguar as aktet e dhunës, që kulmin e tyre e kanë pasur më 23 Qershor 1968, në atë që u quajt edhe tragjedia e Hyrjes 12 të stadiumit.
Përplasja mes tifozërive arriti kulmin, duke bërë që 71 fansa të humbnin jetën dhe rreth 150 të tjerë të mbeteshin të plagosur, në një ngjarje vërtetë tragjike, që hapi një hetim disa vjeçar, ndonëse në fund nuk pati asnjë të dënuar.
Ajo që e bën atë të veçantë është se do të jetë hera e fundit që finalja do të luhet me dy ndeshje – në shtëpi dhe larg saj.
Nga sezoni i ardhshëm, do të jetë vetme një ndeshje në një vend neutral, sikurse që është format i turneut të saj simotër në Evropë, finalja e Ligës së Kampionëve të UEFA-s.
Kurse pikërisht për shkak të rivalitetit të ashpër takimi i dytë u shty dy herë kurse dje u vendos që për herë të parë të luhet në një vend neutral dhe mikpritës do të jetë stadiumi “Santiago Bernbeu” në Spanjë i Real Madridit.
