Këngëtarja Rita Ora është e gati të publikojë një album të ri, pas disa vitesh heshtjeje. Ajo, po ashtu, në muajin nëntor, do të kthehet në qytetin e saj në Londër për MTV Europe Music Awards.
Këngëtarja 26 vjeçare, i tha agjencisë AFP, se do ta këndojë këngën e re nga albumi i saj i ardhshëm, për të cilën ajo ka konfirmuar se po përfundon dhe se e konsideron si çështje tejet personale.
Albumi i saj i ardhshëm, i dyti me radhë, do të paraqitet nga kompania Atlantic Records në Nju Jork.
“Ka pasur shumë frustrime, shumë pikëllime dhe gëzime, derisa unë nuk kam mundur ta vë në vend të parë muzikën, gjatë disa viteve të kaluara”, tha Rita Ora.
E lindur në Kosovë, familja shqiptare e Rita Orës, lëvizi në Londër kur ajo ishte ende e vogël.
Në ceremoninë MTV Europe Music Award, Rita Ora do të jetë shqiptarja e dytë me radhë që është nikoqire.
Vitin e kaluar, në Roterdam, ishte këngëtarja tjetër me prejardhje shqiptare, Bebe Rexha, e lindur në Nju Jork nga prindërit shqiptarë.
