Rio Ferdinand, një nga legjendat e Manchester United, ka rrëfyer një ndër momentet më të vështira të jetës së tij. Një moment që kishte besuar vërtetë se do të ishte fundi dhe ai bashkë me shokët e kombëtares do të vdisnin. Një udhëtim kthimi në Angli me avion ka qenë tmerri më i madh që ata kanë përjetuar.
Kombëtarja e “3 luanëve” po kthehej në vendlindje pas Botërorit gjerman në vitin 2006, ndërkohë që anglezët u eliminuan nga Portugalia. Në teori bëhej fjalë për një udhëtim të shkurtër dhe komod, por në fakt ai udhëtim u kthye në një makth. “Udhëtimi me avion ndodhi në një kohë të keqe dhe menduam se do të vdisnim të gjithë në atë udhëtim, në një tragjedi ajrore. Qanim me dënesë. Unë isha ulur afër Rooney dhe Gerrard, bashkë me gratë e tyre, që qanin dhe ulërinin pa mbarim”, rrëfen Rio Ferdinand.
“Avioni kishte shumë tronditje për shkak të kohës së keqe, hapeshin dyert e kabinës së bagazheve mbi kokat tona dhe fluturonin nëpër avion, duke na goditur. Nuk po merrnim vesh se çfarë po ndodhte. Një tmerr. Edhe unë apo Beckham e Lampard, që ishim mësuar me udhëtime të tilla u trembëm”, thotë Ferdinand.
“Po, nuk e mohoj që mendova se ky ishte fundi edhe për mua. Kjo gjë ndodhi kur pashë në fytyrë stjuardesat dhe aty kuptova se sa e rëndë ishte situata. Ato qëndronin të ulura në vendin e tyre, ishin kthyer në gur, pasi nuk lëviznin dhe luteshin. Në ato moment thashë me vete “e hëngrëm”. Por, na deshi Zoti dhe fati na ndihmoi të mbërrinim gjallë në Angli pas atij udhëtimi mes ferrit. Nuk e di se si, por prekëm tokë”, thotë Rio Ferdinand.
