Mauro Icardi është kthyer në një nga lojtarët më të rëndësishëm tek skuadra e Interit. Ekipi është i interesuar ti rinovojë kontratën lojtarit dhe ti rrisë klauzolën, duke parë që disa ekipe të mëdha kërkuan shërbimet e sulmuesit argjentinas në merkaton e janarit. Piero Ausilio, drejtori sportiv i zikaltërve ka patur kontaktet e para me menaxheren dhe njëkohësisht bashkëshorten e argjentinasit, Wanda Nara.
Kërkesa e parë e agjentes së sulmuesit është përmirësimi i rrogës së futbollistit me 2 milionë euro. Aktualisht Maurito përfiton 4.7 milionë euro dhe pritet të shkojë deri në 6.5 milionë, pa harruar edhe bonuset, që lidhen me objektivat personalë dhe të skuadrës.
Si çdo fillim rinovimi, kërkesa me ofertë nuk janë të barabarta, por diferenca nuk duket e madhe dhe gjithçka mund të arrihet. Wanda Nara kërkon të paktën 7 milionë euro në sezon, ndërsa klauzola e largimit nuk do të hiqet, por thjesht do të rritet në 150 milionë euro, madje mund të shkojë edhe 200 milionë. Nëse vendoset që klauzola të hiqet, atëherë Icardi do të ketë rritje të pagës deri në 8 milionë euro në sezon.
Interi nuk dëshiron ta humbasë “xhevahirin” e tij, por edhe nëse do të jetë i pashmangshëm largimi, nuk duhet të ndodhë për një shumë të vogël. Ndaj synohet që klauzola e largimit të jetë sa më e lartë ose të hiqet fare, në mënyrë që në të ardhmen klubet që dëshirojnë shërbimet e futbollistit të mendohen mirë para se të bëjnë ofertë konkrete.
