Duket se pak vite më parë Spanja ka qenë parajsa e mashtrimit nga yjet e futbollit që luanin atje. Organet fiskale sapo mbyllet një rast hapin tjetrin dhe këtë herë radhën e kishte James Rodriguez. Futbollisti kolumbian që aktualisht ndodhet tek Bayern Munich në Gjermani, e pret një “luftë” e ashpër me organet e drejtësisë spanjolle.
Sipas të përditshmes spanjolle “El Mundo”, futbollisti i detyrohet institucioneve tatimore në vendin iberik 11.6 milionë euro. James Rodriguez mashtrimin e ka kryer në vitin 2014, kur është transferuar në Madrid. Ai e ka deklaruar veten jorezident në Spanjë dhe për pasojë rezulton që ka fshehur nga e drejta e imazhit vlerën e 6.35 milionë eurove.
James Rodriguez flitet se ka fshehur shifrën më të madhe që kishte ndodhur ndonjëherë nga një futbollit së Spanjë, duke llogaritur gjobën dhe interesin shuma shkon rreth 11.6 milionë euro. Kujtojmë që vetëm pak ditë më parë është mbyllur çështja e Cristiano Ronaldos me organet fiskale, ku gjykata e dënoi fillimisht me dy vite burg, por portugezi pranoi që të paguante rreth 19 milionë euro që të mos shkonte pas hekurave.
