Champions League rikthehet, mbrëmjen e kësaj të marte, me dy çerekfinalet e para, të cilat premtojnë shumë. Juventus-Barcelona dhe Borussia Dortmund-Monaco janë dy sfidat e përballjeve të para të këtij turi me eliminim të drejtpërdrejtë.
Barcelona ka mbërritur në Torino, pas një humbjeje shokuese të shtunën në La Liga, në transfertën ndaj ekipit të Malagës. Ndërkohë, Juventusi vjen pas një fitoreje të pastër 2-0 ndaj Chievos, në Seria A.
Edhe pse morali i ekipit katalanas duket se është i ulët përpara kësaj sfide, askush nuk mund t’i zërë besë “blaugranave” të udhëhequr nga Lionel Messi, nëse do të kujtonin përmbysjen e bujshme ndaj PSG-së një raund më parë.
Juventusi, ndërkohë, do të kërkojë të hakmerret për humbjen e finales së Champions League, dy vite më parë.
Në ndeshjen tjetër, Dortmundi vjen pas një humbjeje 1-4, në klasiken e futbollit gjerman, me Bayern Munchen në “Allianz Arena”. Rivalët e gjermanëve, Monaco mirëpritën rikthimin e Radamel Falcaos, pas një periudhe dëmtimi, me kolumbianin që shënoi një dygolësh në fitoren e së shtunës ndaj Angers.
Dortmundi përmbysi humbjen me Benfikën një raund më parë, duke fituar bindshëm në shtëpinë e tij, për të siguruar biletën për në çerekfinale. Ndërsa Monaco, një ekip për t’u lavdëruar për sulmin e papërmbajtshëm, eliminoi Manchester Cityn, në raundin e 1/8-ave.
