Revanshi në kafaz?, Maywether: Jemi në bisedime

Floyd Mayweather pas përballjes në ring me Conor McGregor, duel nga i cili doli fitues ai shpalli pensionimin nga ky sport. Por duket se nuk do të ketë qetësi për të, pasi në ditët e fundit ka pasur shumë replika mes dy sportistëve dhe pritet që të ketë një sfidë revanshi. Ish-kampioni i botës në boks, ku dhe ka rekordin e 50 fitoreve e asnjë humbje, duket se ka dëshirë të provojë fatin në kafaz dhe pritet të debutojë në artet marciale mikse (MMA).

Kjo nuk do të ishte hera e parë që Mayweather rikthehet aktiv, pasi edhe kur u tërhoq për herë të parë, në shtator të 2015-ës, ai pat deklaruar të njëjtën gjë, se nuk ka ndërmend të duelojë. Por përballë fitimit marramendës që pati nga duel me McGregor (arkëtoi 300 milionë dollarë) ai ndërroi mendje, gjë që mund ta përsëritë edhe tani, pavarësisht se luhet në fushën e kundërshtarit.

“A keni dëshirë të më shihni sërish në ring? Nuk e di, gjithçka mund të ndodhë. Nuk e di nëse mund të rikthehem në ring apo kafaz, por po bisedojmë për një marrëveshje që kap shifrën e 1 miliardë dollarëve. Të shohim”, ka deklaruar Floyd Mayweather.

Kohët e fundit, kampioni amerikan i boksit është ngjitur në kafaz dhe ka postuar disa video, duke ngjallur reagimin e McGregor, duke nisur edhe mjaft replika mes tyre, ndaj fansat ëndërrojnë të shohin sërish një tjetër përballje mes dy kampionësh të sporteve luftarake.