Përballja e parë në kafaz mes dy luftëtarëve Conor McGregor e Khabib Nurmagomedov, përfundoi me një sherr masiv dhe për këtë pritet të ketë masa të rrepta. Komisioni i Sportit në Nevada pritet që në dhjetor të marrë vendimin final për fatet e dy sportistëve për atë incident të krijuar pas eventit në UFC-229.
Parashikohet që të dy sportistët të pezullohen nga UFC, por nga ana tjetër nuk kanë reshtur zërat që mes tyre do të ketë edhe një revansh, aq shumë të kërkuar nga irlandezi, McGregor. Por në rast se ata do të pezullohen, ky revansh në kafaz mbetet në dilemë për t’u zhvilluar.
Zgjidhjen për këtë e jep babai i Khabib, Abdulmanap Nurmagomedov, ai u shpreh se të dy sportistët janë të interesuar që revanshi të ndodhë, qoftë edhe në ring. Pra në rast se do të pezullohen, ata kanë parashikuar që të zhvillojnë një duel boksi. Për sportistin rus, kampion bote në peshën e lehtë, ky do të ishte një debutim në ring, por jo për irlandezin, që ka dueluar edhe më parë (ndaj Floyd Mayweather, në gusht të 2017-ës, ku u mund me KO).
“Nëse do të kemi një duel të dytë me Conor në ring, me rregullat e boksit, jemi gati. Kjo është një sfidë që na intereson. Khabib tregoi se është ndër më të mirët në artet marciale mikse dhe këtë gjë mund ta tregojë edhe në ring, pasi i ka aftësitë për të qenë kampion edhe në një duel boksi. Gjithsesi, këtë le t’ia lëmë kohës”, tha babai i Khabib.
