Rikthimi i reshjeve do të ulë sasinë e importit të energjisë elektrike duke përgjysmuar sasinë për tetorin. Ministri i Infrastrukturës dhe Energjisë Damian Gjiknuri gjatë inspektimit të investimeve u shpreh se tashmë situata po shkon drejt stabilizimit, ndërsa sqaroi se situata e krijuar gjatë stinës së verës nuk rëndoi në buxhet.
Shirat e vjeshtës po çojnë drejt stabilizimit prodhimin e enrgjisë në vend, ku përgjatë muajve të verës në vend u ul ndjeshëm prodhimi për shkak të thatësirës së tejzgjatur.
Gjatë inspektimit të një investimi në zonën e Laprakës ministri i Infrastrukturës dhe Energjisë Damian Gjiknuri u shpreh se tashmë pritet që të mos ketë më probleme përsa i përket furnizimit me energji.
“Në varësi të situatës, ne shpresojmë meqë dhe moti ka filluar të ndryshojë. Pjesa e rrezikut të madh financiar është larguar. Nëse ka kriza, ato janë kriza ekstreme këto janë në dorë të Zotit dhe patjetër vendi nuk do të mbetet pa energji. Pjesa më e madhe e rrezikut është tejkaluar. Në kushtet që jemi, edhe me mbështetjen në bazë të aktit normativ, besoj që situata do të jetë e normalizuar”, tha Gjiknuri.
Administratori i OSHEE Adrian Çela u shpreh se investimet do të ndikojnë në përmirësimin e furnizmit me energji elektrike të zonës.
“Brenda këtij viti, kjo zonë do të ketë një linjë të re shpërndarjeje brenda standardeve. Nuk është investimi i fundit që po kryejmë në Tiranë me fondet e OSHEE”, tha Çela.
Nga investimi që po kryhet në zonën e Laprakës pritet të përfitojnë më shumë se 10 mijë abonentë që pritet të përfitojnë një furnizim më të qëndrueshëm e cilësor me energji.
