Edhe pse ka një nga fazat më të mira sulmuese për momentin, Liverpool ka bërë përpjekje për të afruar edhe një tjetër goleador. Bëhet fjalë për sulmuesin izraelit, Munas Dabbur i cili aktivizohet tek Red Bull Salzburg. Por për këtë transferim “Reds” është përballur më një rezistencë të yllit egjiptian Mohamed Salah, i cili më parë kishte refuzuar edhe të shtrëngojë duart me lojtarët izraelitë, për shkak të konfliktit arabo-izraelit.
Edhe pse Mohamed Salah është duke bërë shumë mirë në skenën sportive, që nga mbërritja te Liverpool, “The Jerusalem Post” thotë se ylli egjiptian ka kërcënuar me largim, nëse sulmuesi i lartpërmendur izraelit mbërrin në “Anfield”.
Me sa duket, kjo është arsyeja pse klubi anglez po heziton për nënshkrimin e yllit të Red Bull Salzburg, Munas Dabbur. Natyrisht, kjo ka krijuar një tronditje në Angli, ku disa media si “Mirror” nuk kanë vonuar që t’i bëjë jehonë lajmit.
Në të kaluarën, Mohamed Salah ka pasur probleme, duke refuzuar t’i shtrëngojë duart me lojtarët izraelitë, siç ra shumë në sy në një ndeshje mes Maccabi Tel Aviv dhe Basel, gjatë së cilës ai luajti në ekipin zviceran.
Dabur ka arritur të shënojë 20 gola dhe të japë 6 asiste në 30 ndeshjet, që ka luajtur këtë sezon, ndërsa Salah ka shënuar 14 gola dhe ka dhënë 6 asiste në 25 ndeshje.
