Giani de Biasi vazhdon të jetë me ‘pushime’ që pas shkarkimit nga Alaves në Spanjë. Ish-trajneri i kombëtares shqiptare gjatë kësaj periudhe ka refuzuar disa oferta, por edhe është refuzuar në disa raste ku ka mbetur i zhgënjyer për mënyrën si është trajtuar.
Të interesuar për të zakonisht kanë qenë skuadra që luftojnë për mbijetesë, por italiani kërkon një skuadër që të ketë objektiva për të fituar trofe apo për të marrë pjesë në Europë. Një prej tyre është edhe Palermo, klub ku De Biasi ka luajtur për tre vite gjatë karrierës së tij e ku u kthye në një nga mesfushorët më të njohur në Itali.
Në një intervistë për “Corriere Dello Sport”, De Biasi ka treguar edhe se si Mauricio Zamparini e kontaktonte vazhdimisht për t’i ofruar pankinën e Palermos, për herë të fundit në mbyllje të sezonit të kaluar.
“Më tha se do të ishte sjellje e edukuar nëse do të përgjigjesha menjëherë, por isha për drekë në një shpellë. Nuk e telefonova menjëherë pasi m’u desh një natë që ta mendoja. Mëngjesin e nesërm, i komunikova që nuk ma ndjente. Mbeteshin edhe 4 ndeshje për t’u luajtur dhe nuk mund ta ndihmoja, përndryshe do të shkoja me vrap atje”, tregoi De Biasi bashkëbisedimin me presidentin e Palermos.
