Cristiano Ronaldo nuk ishte në fushë në eliminimin e Real Madridit nga Copa del Rey, ku u mposht nga Leganes në “Bernabeu” me rezultatin 2-1. Ylli portugez nuk u ftua në këtë sfidë për shkak të dëmtimit që pësoi në fytyrë në ndeshjen e fundit. Reali kishte fituar në ndeshjen e parë në transfertë me rezultat 1-0, por që u zhvlerësua nga rezultati i ndeshjes së dytë.
Me 19 pikë mbrapa liderit, Barcelonës, në La Liga kur ka kaluar gjysma e sezonit dhe eliminimit të freskët nga Kupa e Mbretit, Real Madridit i ka mbetur të luftojë vetëm në një front, Ligën e Kampionëve, ku për kundërshtar në fazën e eliminimit direkt do ta ketë një skuadër shumë të fortë, PSG-në.
Karriera e Zinedine Zidane është e varur nga kjo sfidë në Champions League, pasi nëse eliminohen nga kjo garë atëherë është jashtë çdo kompeticioni. Pas kritikave dhe pesimizmit, Cristiano Ronaldo e ka zgjedhur rrjetin social Twitter për të dërguar mesazh pozitiv. “Kurajë skuadër. Kurajë madrilenë. Ende kemi shumë beteja për t’i fituar”, ka shkruar ylli portugez.
